എംപിവികൾ പൊതുവെ ക്ലച്ച് പിടിക്കാത്ത മാർക്കറ്റാണ് ഇന്ത്യ എന്ന ധാരണ തിരുത്തി കുറിച്ചാണ് തൊട്ടതെല്ലാം പൊന്നാക്കുന്ന ചരിത്രമുള്ള മാരുതി സുസുക്കി എർട്ടിഗയെ വില്പനക്കെത്തിച്ചത്. എതിരാളികളെ അത്ഭുതപ്പെടുത്തി എർട്ടിഗ വിപണിയിൽ ക്ലച്ച് പിടിച്ചു. പിന്നീട് കഴിഞ്ഞ വർഷമാണ് എർട്ടിഗയുടെ പ്രീമിയം സഹോദരൻ എക്സ്എൽ6 നെ മാരുതിയുടെ പ്രീമിയം കാറുകൾ മാത്രം വിൽക്കുന്ന ശൃഖയായ നെക്സ വഴി വില്പനക്കെത്തിയത്. ഒരു വർഷം തികയുമ്പോൾ എക്സ്എൽ6ന്റെ പ്രകടനം മാരുതി സുസുക്കിയുടെ തൊപ്പിയിൽ ഒരു പൊൻതൂവലാണ്. കഴിഞ്ഞ വർഷം ഓഗസ്റ്റിൽ വില്പനക്കെത്തി ഒരു വർഷം തികയുമ്പോൾ 25,000 യൂണിറ്റിലധികം വില്പന നേടിയിട്ടുണ്ട് എക്സ്എൽ6. പ്രീമിയം വിലയും 6-സീറ്റർ കോൺഫിഗറേഷനുമായി വില്പനക്കെത്തിയ എക്സ്എൽ6-ന് ഒരു വർഷത്തിനകം 25,000 യൂണിറ്റ് വില്പന മികച്ചതാണ്. മാത്രമല്ല പെട്രോൾ എൻജിൻ മാത്രമേ എക്സ്എൽ6 ശ്രേണിയില് വില്പനയ്ക്കുള്ളൂ എന്നുള്ളതും കൂട്ടിവായിക്കണം. കൂടാതെ എംപിവി സെഗ്മെന്റിൽ 51 ശതമാനം വിപണി വിഹിതം സ്വന്തമാക്കാൻ എർട്ടിഗയോടൊപ്പം എക്സ്എൽ6 തങ്ങളെ സഹായിച്ചു എന്നും മാരുതി സുസുക്കി പത്രക്കുറിപ്പിൽ വ്യക്തമാക്കി. മാരുതി സുസുക്കി എക്സ്എൽ6 എർട്ടിഗയെക്കാൾ സ്പോർട്ടിയായ ഒരു വകഭേദം ആണ്. ചുരുക്കത്തിൽ എർട്ടിഗയുടെ നല്ലകുട്ടി ഡിസൈനിനു വിപരീതമായി കുറച്ചു ഫ്രീക്കനായ സഹോദരന് ആണ് എക്സ്എൽ6. ക്രോം ലൈനുള്ള വലിയ ഗ്രില്ലാണ് എക്സ്എൽ6ന്. ക്രോം ലൈനിന്റെ തുടർച്ചയെന്നോണം ഹെഡ്ലാംപുകളിലേക്കു കയറി നിൽക്കുന്ന ഡേടൈം റണ്ണിങ് ലാമ്പുകൾ, കറുപ്പ് ക്ലാഡിങ്ങും, സ്കിഡ് പ്ലേറ്റുകളുമായി കൂടുതൽ സ്പോർട്ടിയായ ബമ്പറുകൾ, കറുപ്പിൽ പൊതിഞ്ഞ റിയർവ്യൂ മിറർ, 15-ഇഞ്ച് കറുപ്പ് അലോയ് വീലുകൾ എന്നിവയാണ് എക്സ്എൽ6-ന്റെ സവിശേഷതകൾ. എക്സ്റ്റീരിയറിന്റെ സ്പോർട്ടി തീമിനോട് യോജിക്കും വിധം കറുപ്പിൽ പൊതിഞ്ഞതാണ് എക്സ്എൽ6ന്റെ ഉൾവശം. രണ്ടാം നിരയ്ക്ക് ബക്കറ്റ് സീറ്റ് ആണ് എക്സ്എൽ6-ന്റെ ഹൈലൈറ്റ്. ആൻഡ്രോയിഡ് ഓട്ടോ, ആപ്പിൾ കാർപ്ലേയ് എന്നിവ ഉപയോഗിക്കാവുന്ന 7-ഇഞ്ച് സ്മാർട്പ്ലേയ് സ്റ്റുഡിയോ ഇൻഫോടെയ്ൻമെൻറ് സിസ്റ്റം, ഓട്ടോമാറ്റിക് ക്ലൈമറ്റ് കൺട്രോൾ, LED ഡിആർഎൽ, കീലെസ് എൻട്രി, ക്രൂസ് കണ്ട്രോൾ, പുറകിൽ പാർക്കിങ് ക്യാമറ എന്നിങ്ങനെ ധാരാളം ഫീച്ചറുകളാൽ സമൃദ്ധമാണ് എക്സ്എൽ6. 138എൻഎം ടോർക്കും ഉല്പാദിപ്പിക്കുന്ന ഭാരത് സ്റ്റേജ് 6 മലിനീകരണ നിയന്ത്രണ മാനദണ്ഡങ്ങൾ പാലിക്കുന്ന 1.5-ലിറ്റർ കെ15 പെട്രോൾ എൻജിൻ ആണ് എക്സ്എൽ6-ന്. മൈൽഡ് ഹൈബ്രിഡ് സംവിധാനത്തോടൊപ്പം പ്രവർത്തിക്കുന്ന ഈ എൻജിനൊപ്പം അഞ്ചു സ്പീഡ് മാന്വൽ, നാല് സ്പീഡ് ഓട്ടോമാറ്റിക് എന്നിവയാണ് ഗിയർബോക്സ് ഓപ്ഷനുകൾ. 9.91 ലക്ഷം മുതൽ 11.59 ലക്ഷം വരെയാണ് മാരുതി സുസുക്കി എക്സ്എൽ6-ന്റെ വില.
